തോന്ന്യവാസിയുടെ തോന്ന്യാസങ്ങള്‍!!

ബോട്ടിനെ പറ്റി ഒന്നും അറിയാത്ത ബോട്ട് ഇന്സ്പെക്ടരെ ജോലിക്ക് നിയമിച്ചവരെ എന്ത് ചെയ്യണം?

2009-10-08T13:24:00.000-07:00

തേക്കടി ദുരന്തത്തിന് കാരണം ആയ ബോട്ടിന് സര്‍ട്ടിഫിക്കറ്റ് കൊടുത്ത ഇന്‍സ്പെക്ടര്‍ പറയുന്നത് അങ്ങേര്‍ക്കു ബോട്ടിനെ പറ്റി ഒന്നും അറിഞ്ഞു കൂടാ എന്നാണ്. അങ്ങേര്‍ പാവം ഒരു മെക്കാനിക്കല്‍ എഞ്ചിനീയര്‍ ആണ് എന്നാണ്. ഇങ്ങനെയുള്ളവരെ ഒക്കെ ഈ ജോലിയിലേയ്ക്ക് നിയമിച്ചവരെ നാം എന്ത് ചെയ്യണം? കുറഞ്ഞ പക്ഷം കൊലക്കുറ്റത്തിന് കേസ് എടുക്കുക എങ്കിലും വേണ്ടേ?

ഇന്നിതാ ഈ മാന്ന്യ ദേഹത്തിന്റെ സഹ പ്രവര്‍ത്തകരായ എന്ജിനീയര്മാരുടെ അസോസിയേഷന്‍ പുള്ളിക്കാരനെ അറസ്റ്റ് ചെയ്തതില്‍ പ്രതിഷേധിച്ചു സമര പ്രഖ്യാപനം നടത്തിയിരിക്കുന്നു. സ്വന്തം കൂട്ടത്തില്‍ നില്ല്കുന്നവന്‍ എന്ത് ചെറ്റത്തരം ചെയ്താലും ന്യായീകരിക്കുകയും ഒതുക്കിതീര്‍ക്കുകയും ചെയ്യുന്ന നമ്മുടെ സ്വഭാവം ഇതാ ഒരിക്കല്‍ കൂടെ കാണിക്കുന്നു. നേരത്തെ അത് പിണറായിയെ ന്യായീകരിചു രക്ഷിക്കാന്‍ ശ്രമിക്കുന്ന കമ്മ്യൂണിസ്റ്റ്‌ പാര്‍ടിയുടെ രൂപത്തിലും, അഭയ കേസ് പ്രതികളെ രക്ഷിക്കാന്‍ ശ്രമിക്കുന്ന കത്തോലിക്കാ സഭയുടെ രൂപത്തിലും, ബോംബ്‌ വെച്ച സ്വമിനിയെ രക്ഷിക്കാന്‍ ശ്രമിച്ച സംഘ പരിവാറിന്റെ രൂപത്ത്തിലുമൊക്കെ നമ്മള്‍ കണ്ടതാണ്. മേരാ ഭരത് മഹാന്‍ എന്നല്ലാതെ എന്ത് പറയാന്‍!

സ്വകാര്യ വ്യക്തികളുടെ ബോട്ട് ആണെങ്കില്‍ ഉടമസ്ഥനെതിരെയും കേസ് എടുക്കാന്‍ കാണിക്കുന്ന ശുഷ്കാന്തി സര്‍ക്കാര്‍ വണ്ടികളുടെ കാര്യത്തില്‍ വരാത്തത്‌ എന്ത് കൊണ്ട്?

ഇതേ സംഭവം തന്നെ സര്‍ക്കാര്‍ കോളേജുകളില്‍ നടക്കുന്ന റാഗ്ഗിങ്ങും സ്വാശ്രയ കോളേജില്‍ നടക്കുന്ന റാഗ്ഗിങ്ങിന്റെ കാര്യത്തിലും കാണുന്നുണ്ട്. സ്വകാര്യ കോളേജ് ആണെങ്കില്‍ (അവിടെ റാഗ്ഗിംഗ് സര്‍ക്കാര്‍ സ്ഥാപനങ്ങളെക്കാളും വളരെ കുറവ്‌ ആണെന്ന് എല്ലാവര്ക്കും അറിയാം) എന്തൊരു ബഹളം ആണ്. കഴിഞ്ഞ ദിവസം പ്രണയ നൈരാശ്യത്തിന്‍റെ പേരില്‍ ഒരു പെണ്‍ കൊച്ചു മരിച്ചപ്പോഴും നമ്മുടെ കുട്ടി നേതാക്കള്‍ക്ക് എന്തൊരു ഉത്സാഹം ആയിരുന്നു. സമരിക്കാനും, ആരോപണങ്ങള്‍ ഉന്നയിക്കാനും!

ഗൂഗിള്‍ മെയില്‍ (ജിമെയില്‍) ഇപ്പോള്‍ മലയാളം എഴുതും!

2009-03-31T16:26:00.000-07:00

എങ്ങനെ എഴുതണം എന്ന് അറിയാന്‍ ഈ ലിങ്കില്‍ നോക്കുക!!

http://googleblog.blogspot.com/2009/03/email-in-indian-languages.html

ഐഡിയ സ്റ്റാര്‍ സിംഗര്‍ എന്ന ബിസിനസ്സ്

2009-02-24T00:29:00.000-08:00

ഐഡിയ സ്റ്റാര്‍ സിംഗര്‍ ഒരു ബിസിനസ്സ് ആണ്. എങ്ങനെ കൂടതല്‍ ആളെ കൂട്ടാമെന്നും TRP എങ്ങനെ കൂട്ടാമെന്നും ആണ് അവര്‍ നോക്കുന്നത്. അത് കൂടുന്നത് വഴി ആണ് അവരുടെ പരസ്യം കൂടുന്നത്. അങ്ങനെ വരുമാനവും. പിന്നെ TRP-യില്‍ നോക്കുന്ന വേറെ ഒരു കാര്യം പരസ്യം ചെയ്യപ്പെടുന്ന ഇനങ്ങള്‍ വാങ്ങാന്‍ കയ്യില്‍ പൈസ ഉള്ളവരുടെ താല്‍പ്പര്യം ആണ്. അവര്‍ കൂടുതല്‍ കണ്ടാലെ ആ ഇനം പരസ്യം കൂടുതല്‍ കിട്ടൂ. അങ്ങനെ വരുമ്പോള്‍ സാധാരണക്കാരായ ദരിദ്ര നാരായണന്മാരുടെ താല്‍പ്പര്യം അനുസരിച്ചല്ല പ്രോഗ്രാം നീങ്ങുക. പരസ്യത്തില്‍ കാണിക്കുന്ന വില്ലകള്‍ ഒക്കെ മേടിക്കാന്‍ പൈസ ഉള്ള കൊടീശ്വരന്മാരുടെ താല്‍പ്പര്യം അനുസരിച്ചായിരിക്കും. പിന്നെ ബാക്കിയുള്ള പരസ്യ ഇനങ്ങള്‍ വാങ്ങിക്കാന്‍ പാങ്ങുള്ള കുറെ ലക്ഷാധിപതികളുടെയും. അത്രയ്ക്കും സമ്പന്നമായ ഒരു ഓഡിയന്‍സിനു് ഇഷ്ടപ്പെടുന്ന വിധത്തിലെ ഈ പരിപാടി ഓടൂ.

ആന്ധ്രയില്‍ പെണ്‍കുട്ടികളെ ആസിഡ് എറിഞ്ഞവരെ പോലീസ് വെടി വെച്ചു കൊന്നു. വളരെ നല്ല കാര്യം!!

2008-12-13T15:14:00.000-08:00

അവരെ പോലീസുകാര്‍ എങ്ങാനും കള്ളക്കേസില്‍ കുടുക്കുകയോ തങ്ങള്‍ക്കു മറ്റെന്തെങ്കിലും വിധത്തിലുള്ള വ്യക്തി വൈരാഗ്യം തീര്‍ക്കാന്‍ ഉപയോഗിക്കുകയോ ചെയ്‌താല്‍ അതിനെപ്പറ്റി എനിക്ക് ഓര്‍ക്കാന്‍ കൂടി വയ്യ.

അല്ല എങ്കില്‍, അവര്‍ ശരിക്കും ആ കുറ്റകൃത്യം ചെയ്തവര്‍ ആണെങ്കില്‍ അവര്‍ക്ക് അവര്‍ അര്‍ഹിച്ചതു കിട്ടി എന്നേ എനിക്ക് അഭിപ്രായം ഉള്ളൂ. നമ്മള്‍ പൊതു ജനത്തിന്റെ നികുതിപ്പണവും കൊണ്ട് പുട്ടടിച്ച് ഇവന്മാര്‍ ഒന്നും കുറെ നാള്‍ കൂടി ജയിലില്‍ സുഖിച്ചു ജീവിക്കില്ലല്ലോ.

പാര്‍വതിക്ക് അഭിനന്ദനങ്ങള്‍!!

2008-12-13T09:56:00.000-08:00

ആദ്യത്തെ മലയാളി ലോക സുന്ദരി നമ്പര്‍ 2 പാര്‍വതിക്ക് അഭിനന്ദനങ്ങള്‍!!

രാഷ്ട്രീയക്കാര്‍ എന്തിനാണ് തീവ്രവാദ പോരാട്ടങ്ങളുടെ ഇടയ്ക്ക് വന്നു പത്രസമ്മേളനം നടത്തുന്നത്?

2008-11-28T10:06:00.000-08:00

സാമാന്ന്യ ബോധം ഉള്ള ആര്ക്കും മനസ്സിലാവുന്ന ഒരു കാര്യം ആണ് പട്ടാളത്തെയും പോലീസിനെയും അവര്‍ക്കറിയാവുന്ന പണി ചെയ്യാന്‍ വിടണമെന്നത്. അതിന്റെ ഇടയ്ക്ക് രാഷ്ട്രീയക്കാര്‍ വന്നു സംഭവ സ്ഥലത്തു വന്നു കയറി വിഡ്ഡിത്തരങ്ങള്‍ എഴുന്നള്ളിക്കുകയും പത്ര സമ്മേളനം നടത്തുകയും ചെയ്യുന്നതിന്റെ ആവശ്യം എന്താണ്. ഈ VIP കള്‍ കെട്ടിയെടുക്കുമ്പോള്‍ അവര്‍ക്ക് സുരക്ഷ കൊടുക്കാന്‍ ഉള്ള അധിക ചുമതല കൂടെ പട്ടാളത്തിന്‍റെ/പോലീസിന്റെ തലയില്‍ വരുകയാണ്. TV യിലോ പത്രത്തിലോ തല കാണിക്കാനുള്ള അവസരം ഒരിക്കലും രാഷ്ട്രീയക്കാര്‍ കളയില്ലല്ലോ? മുംബെയില്‍ ഗോപിനാഥ് മുണ്ടെയും മുഖ്യമന്ത്രി ദേശ്മുഖും പിന്നെ വേറെ ചില വിവര ദോഷികളും ഈ വിഡ്ഢിത്തരം ആവര്‍ത്തിച്ചു.

ഷാനിയുടെ തമാശകള്‍; മനോരമയുടെയും!!

2008-11-27T13:57:00.000-08:00

മനോരമ ചാനലില്‍ ഷാനിയുടെ വക ചില അഭിപ്രായങ്ങള്‍ കേട്ടു. "ATS കണ്ടിട്ട് പോലും ഇല്ലാത്ത ആയുധങ്ങളും ആയാണ് തീവ്രവാദികള്‍ വന്നത് " എന്ന്. AK-47, അവരാരും കണ്ടിട്ടില്ലെന്നാണോ ഷാനി ഉദേശിച്ചത്? സാദാ പോലീസുകാരുടെ കാര്യത്തില്‍ ചിലപ്പോള്‍ അത് ശരിയായിരുന്നേനെ. ATS കാരുടെ കാര്യത്തില്‍ അത് ശരിയാകുമോ?

ഷാനി അങ്ങനെ എന്‍റെ ബ്ലോഗില്‍ ഒരു കമന്റ് ഇട്ടു!!

ATS ക്കാരും SPG ക്കാരും ഒക്കെ നല്ല നിലവാരം ഉള്ള പരിശീലനം സിദ്ധിച്ചവര്‍ ആണെന്നായിരുന്നു ഞാന്‍ മനസ്സിലാക്കിയത്. എന്‍റെ തെറ്റിധാരണ ആയിരിക്കും. ഒരു ചാനലിലും AK-47 അല്ലാതെ എം.എം.ജി, എം.16 ഒക്കെ ഉപയോഗിക്കുന്ന കാര്യം ഒരിടത്തും പറയുന്നത് ഞാന്‍ ഇതു വരെ കണ്ടില്ല.

പിന്നെ ഇത്രയും ബന്ധികളെ വെച്ചു കൊണ്ട്, ഇത്രയും പ്ലാനോടെ എത്തിയ തീവ്ര വാദികളെ, തുരത്താന്‍ സമയം എടുക്കുന്നതിനെ പറ്റി ഇന്നലെ പരാതി പറയുന്നതു കണ്ടത് തീരെ ബാലിശമായിപ്പോയി!! ബന്ദികളുടെ സുരക്ഷയും സ്വന്തം സുരക്ഷയും ഉറപ്പാക്കാതെ കമാണ്ടോകള്‍ക്ക് ആക്ക്രമണം നടത്താന്‍ സാധിക്കുകയില്ലെന്ന് മനസ്സിലാക്കാതെ അവരെ കുറ്റം പറയുന്നത്, പ്രത്യേകിച്ചും ഓപ്പരേഷന്‍ കഴിയുന്നതിനു മുമ്പേ അത് ചെയ്യുന്നത്, തീരെ പിള്ളേര് കളി ആയിപ്പോയി!!

മുകുന്ദന്‍ ഒരു സത്യം പറഞ്ഞു!!

2008-11-07T14:49:00.000-08:00

മുകുന്ദന്‍ ഒരു സത്യം പറഞ്ഞു!! കേരളത്തില്‍ ആര്ക്കും പറയാന്‍ ധൈര്യം ഇല്ലാത്ത ഒരു കാര്യം. മുകുന്ദന്‍, തസ്ലീമ നസ്രീനെ പോലെ നാട് കടത്തപ്പെടുമോ എന്ന് നോക്കി ഇരുന്നു കാണാം!!

ഗൂഗിള്‍ ഇതാ മലയാളത്തിലും!!

2008-11-05T09:52:00.000-08:00

ഗൂഗിള്‍ ഇതാ മലയാളത്തിലും!! ഇനി നമുക്കു മലയാളത്തിലും സേര്‍ച്ചാം!! ഇവിടെ ഞെക്കൂ!!

20-20 യും ഇടി സംവരണവും!!

2008-10-29T05:09:00.000-07:00

മമ്മൂട്ടിക്കും മോഹന്‍ലാലിനും സീനിയോരിറ്റി അനുസരിച്ച് ഇടിക്കാനുള്ള ചാന്‍സ് സംവരണം ചെയ്തു കൊടുത്തിരിക്കുന്നു. ട്രെയിലരില്‍ വരെ. പ്രായത്തില്‍(അഭിനയത്തിലും) സ്വല്പം മൂത്തവനായ മമ്മൂട്ടിക്ക് ആദ്യ ഇടിയുടെ അവകാശം. അത് കഴിഞ്ഞു അതെ ആംഗിളിലും അതെ രീതിയിലും ഒരു ഇടി തിരിച്ചടിക്കാന്‍ ലാലിനും ഒരു ചാന്‍സ്. അല്ലെങ്കില്‍ 2 കൂട്ടരുടെയും ആരാധകര്‍ കൂടി തീയേറ്റര്‍ കത്തിച്ചാലോ!! ഓരോ താരത്തിനും കൊടുക്കുന്ന മിനുട്ടുകളും സെകണ്ടുകളും ഒക്കെ അരിച്ചു തൂക്കി വരുമ്പോള്‍ പടം മൊത്തത്തില്‍ അസഹനീയം ആവുമോ അതോ സഹനീയം എങ്കിലും ആയിരിക്കുമോ ആവോ?

ഇവിടെ 20-20 ട്രെയിലര്‍ കണ്ടതിനെ പറ്റിയാണെഴുതിയിരിക്കുന്നത്.

ഇന്നിതാ ഒരു പുതിയ സംഭവ വികാസം!! മോഹന്‍ലാല്‍ ഫാന്‍സ്‌ അസോസിയേഷന്‍ പ്രതിഷേധവുമായി രംഗത്ത് വന്നിരിക്കുന്നു!! 20-20 യുടെ പോസ്റ്റരില്‍ മമ്മൂട്ടിയെ നടുക്ക് നിര്‍ത്തിയതില്‍ അവര്ക്കു അതൃപ്തി!! വന്നു വന്നു ഈ മലയാളിയൊക്കെ തമിഴനെയും തെലുന്‍കനെയും കന്നഡിഗനെയുംകാള്‍ വിവര ദോഷികള്‍ ആയി മാറിയിരിക്കുന്നു. ഇതില്‍ പ്രതിഷേധിച്ചു കൊണ്ട് ഇവര്‍ ആരെങ്കിലും മണ്ണെണ്ണ ഒഴിച്ച് ആത്മാഹൂതി ചെയ്യുമോ എന്ന് കാത്തിരുന്ന് കാണാം!!

ഖാലിദ് മുഹമ്മദ് ഷേക്ക്‌ ഇന്‍റര്‍നെറ്റ് സൌകര്യം ആവശ്യപ്പെട്ടു!!

2008-10-12T14:35:00.000-07:00

ഖാലിദ് മുഹമ്മദ് ഷേക്ക്‌ ഇന്‍റര്‍നെറ്റ് സൌകര്യം ആവശ്യപ്പെട്ടു എന്ന വാര്‍ത്ത കണ്ട് എനിക്ക് ചിരി വന്നു. ഗു്വാന്ടനമോയിലെ ജയിലില്‍ കിടക്കുന്ന ഷേക്ക്‌ തനിക്ക് കേസ് വാദിക്കാന്‍ അമേരിക്കന്‍ ഭരണകൂടം കൊടുത്ത ലാപ്ടോപ്പില്‍ നെറ്റ് കണക്ഷന്‍ വേണമെന്നു ആവശ്യപ്പെട്ടിരുന്നു. ഈ ആവശ്യം കക്ഷിയുടെ കേസ് വിധി പറയുന്ന പട്ടാള കോടതി ജഡ്ജി നിഷേധിച്ചു. ഷേക്കിനു നെറ്റ് കണക്ഷന്‍ കൊടുത്താല്‍ അത് ഭയങ്കര തീവ്രവാദത്തിനു ഇടയാക്കുമെന്നാണ് പുള്ളിക്കെതിരെ വാദിക്കുന്ന വക്കീലന്മാരുടെ അഭിപ്രായം.

അമേരിക്കയ്ക്കെതിരെ യുദ്ധം നടത്തി ഇപ്പോള്‍ ജയിലില്‍ കിടന്നു കൊണ്ട് അമേരിക്കക്കാരന്റെ ചിലവില്‍ അവരുടെ ലാപ്ടോപ് ഉപയോഗിച്ച് കേസ് വാദിക്കുന്ന സംഭവം ഒരു സംഭവം തന്നെ ആണ്.

സത്യം പറഞ്ഞാല്‍ ഷേക്കിനു നെറ്റ് കൊടുക്കുകയായിരുന്നു വേണ്ടത്. പുള്ളി ആരുമായാണ് ചാറ്റുന്നത് എന്ന് നോക്കി കുറേ സഹ തീവ്ര വാദികളെ പിടിക്കാന്‍ പറ്റുമായിരുന്നു. ഏറ്റവും കുറഞ്ഞത് ഒസാമയുടെ ഇമെയില്‍ അഡ്രസ്സ് എങ്കിലും കിട്ടുമായിരുന്നു. ജയിലിലെ നെറ്റ് ഒക്കെ സെന്‍സര്‍ ചെയ്യാനുള്ള സൌകര്യം അമേരിക്കയ്ക്കുണ്ട്.

ഡല്‍ഹിയിലെ ഭീകര ആക്രമണവും അതിനെതിരെ പോലീസിന്റെ നടപടിയും..

2008-09-29T11:36:00.000-07:00

എന്തൊരു ദയനീയമായ രീതിയിലായിരുന്നു പോലീസിന്റെ പ്രവര്‍ത്തനങ്ങള്‍? തീവ്രവാദികള്‍ താമസിക്കുന്നിടത്തേയ്ക്ക് യാതൊരു പ്ലാനും ഇല്ലാതെ ഇടിച്ചു കയറുക. ഒരു പോലീസുകാരന്‍ മരിക്കുകയും മറ്റൊരാള്‍ക്ക്‌ വെടിയേല്‍ക്കുകയും ചെയ്തു. പോരാത്തതിന് ആരാണ് തീവ്രവാദികളെ കുറിച്ചു വിവരം നല്‍കിയതെന്ന് പത്ര പ്രസ്താവനകളും. സാമാന്യ ബോധം ഉള്ള ഏതെങ്കിലും കുറ്റാന്വോഷണ ഏജന്‍സികള്‍ തങ്ങള്‍ക്കു കിട്ടിയ വിവരത്തിന്റെ സ്രോതസ് വെളിപ്പെടുത്തുമോ? അത് മറ്റു തീവ്രവാദികള്‍ക്ക് രക്ഷപെടാന്‍ ഉള്ള അവസരം ഉണ്ടാക്കി കൊടുക്കുക മാത്രം അല്ലെ ഉള്ളൂ? ഒരു ബോംബ് സ്ഫോടനം നടന്ന സ്ഥലത്ത് പൊതു ജനം തലങ്ങും വിലങ്ങും കയറി നടക്കുന്നത് കണ്ടു. ഫോറന്‍സിക്‌ വിദഗ്ദര്‍ എത്തുന്നതിനു മുംബ് സംഭവ സ്ഥലം ആളുകള്‍ കയറി തെളിവുകള്‍ നശിക്കാതെ സൂക്ഷിക്കേണ്ടത് ഒരു സാമാന്ന്യ തത്വം ആണ്. അതൊന്നും ഇവിടെ പാലിക്കുന്നില്ല. ചില പോലീസുകാര്‍ ഗ്ലൌസ് ഇല്ലാതെ തെളിവുകള്‍ ശേഖരിക്കുന്ന കാഴ്ച്ചയും കണ്ടു. ഈ 21-അം നൂറ്റാണ്ടിലും നമ്മുടെ പോലീസുകാര്‍ക്ക് ഈ വക കാര്യങ്ങളില്‍ യാതൊരു പരിശീലനവും കൊടുക്കുന്നില്ലേ? എങ്ങനെ കൈക്കൂലി വാങ്ങണമെന്നും രാഷ്ട്രീയ/കള്ളപ്പണ/അധോലോക/ബിസിനസ്സ് ഏമാന്മാരെ എങ്ങനെ സന്തോഷിപ്പിച്ചു നിര്‍ത്തണമെന്ന് മാത്രമെ ഇവരെ പഠിപ്പിക്കുന്നുള്ളോ?

എക്സ്പ്രസ്സ് ഹൈവേയും കേരളവും പിന്നെ കുറെ വിവര ദോഷി സാംസ്കാരിക നായകരും!!

2008-05-31T15:06:00.000-07:00

കേരളത്തിലെ വഴികളുടെ കാര്യം നാം എല്ലാവര്‍ക്കും അറിയാവുന്നതാണ്. ഇവിടെ നല്ല കുറേ ഹൈവേകള്‍ ഉണ്ടായിരുന്നെന്കില്‍ നമ്മുടെ യാത്രാ സമയം എത്ര കണ്ടു കുറയുമായിരുന്നെന്നു എന്നെങ്കിലും നല്ല ഒരു ഹൈ വേയില്‍ വണ്ടി ഓടിച്ചിട്ടുള്ളവര്‍ക്കെല്ലാം അറിയാമായിരിക്കണം. നമ്മുടെ ഗതികേട് കൊണ്ട് അങ്ങനെ ഒരു ഭാഗ്യം ഉണ്ടായിട്ടുള്ള മലയാളി എല്ലാം തന്നെ വിദേശ രാജ്യങ്ങളില്‍ ആയിരിക്കും. ഇവിടെ ഉള്ള അച്ചു മാമനും സുകുമാര്‍ അഴീക്കൊടിനോടും ഒന്നും 21-അം നൂറ്റാണ്ടില്‍ മനുഷ്യന്‍ സന്ച്ചരിക്കുന്നത് മണിക്കൂറില്‍ 100-150 കിലോമീറ്റര്‍ അടുത്ത സ്പീടിലാണെന്ന് പറഞാല്‍ ഇവര്‍ക്കെവിടെ മനസ്സിലാകാന്‍. ഇവര്‍ കണ്ടിട്ടുള്ളതെല്ലാം ഇവിടത്തെ 25-35 കിലോമീറ്റര്‍ സ്പീടിലുള്ള യാത്ര മാത്രമല്ലേ ഉള്ളൂ? ഇവിടെ സ്പീഡ് കണക്കു കൂട്ടുമ്പോള്‍ ഒരു മണിക്കൂറില്‍ എത്ര ദൂരം യാത്ര ചെയ്യാന്‍ സാധിക്കുന്നു എന്നുള്ളതിനാണു ഞാന്‍ പ്രാധാന്യം കൊടുത്തത്. കേരളത്തിലും 100 കിലോ മീറ്ററില്‍ യാത്ര ചെയ്യാന്‍ പറ്റുന്ന റോഡ് കണ്ടേക്കും. പക്ഷെ നമുക്കത് 1 മിനിട്ട് നേരമേ ചെയ്യാന്‍ പറ്റൂ.

കഴിഞ്ഞ ദിവസം സുകുമാര്‍ അഴീക്കോടിന്റെ വക വിഡ്ഡിത്തരം കണ്ടു. കേരളത്തില്‍ നാലുവരി പാത മാത്രമേ ആവശ്യമുള്ളൂ. അതില്കൂടുതല്‍ ഉള്ള എക്സ്പ്രസ്സ് വേയൊക്കെ വലിയ പണക്കാര്‍ക്ക് മാത്രമെ ആവശ്യമുള്ളൂ എന്ന്. 5-10 കൊല്ലം കഴിയുമ്പോള്‍ കേരളത്തില്‍ എല്ലാവര്‍ക്കും തന്നെ കാര്‍ ഉണ്ടാകും. അന്ന് 4 വരി പാത കൊണ്ട് എന്താകാന്‍ എന്ന് ചിന്തിക്കാനുള്ള ബോധം ഒന്നും ഇവര്‍ക്കില്ലേ? കേരളത്തില്‍ യാത്ര ചെയ്യുന്ന പാവങ്ങള്‍ക്കൊന്നും പെട്ടെന്ന് അവരുടെ ലക്ഷ്യാ സ്ഥലത്തെത്തിയാല്‍ എന്താ സംഭവിക്കുക? അവര്‍ എല്ലാം ഒച്ചിഴയുന്ന വേഗത്തില്‍ മാത്രം സന്ച്ചരിച്ചാല്‍ മതിയെന്നാണോ അഴീക്കോട്‌ പറയുന്നത്. എക്സ്പ്രസ്സ് വേയ്കള്‍ വന്നാല്‍ അത് വഴി ബസ്സ് യാത്ര നടത്തുന്ന സാധാരണക്കാരും അവരുടെ ലക്ഷ്യത്തില്‍ പെട്ടെന്ന് എത്തി ചേരുന്നുവെന്ന കാര്യം ഈ സാംസ്കാരിക നേതാവ് എന്ത് കൊണ്ട് മനസ്സിലാക്കുന്നില്ല?

ഇപ്പോള്‍ കേരളത്തില്‍ ഉള്ള റോഡുകള്‍ വീതി കൂട്ടിയെടുത്താല്‍ മാത്രം മതിയെന്ന് പറയുന്ന അഴീക്കോടിനെ പോലെയുള്ളവര്‍ക്ക് എക്സ്പ്രസ്സ് ഹൈ വേയ്കളെ പട്ടി ഒന്നും അറിഞ്ഞു കൂടെന്നതാണ് സത്യം. അവയുടെ ചില സാമാന്യ പ്രത്യേകതകള്‍ ഇവയാണ്‌.

1. രണ്ടു വശവും മിക്കവാറും ഭാഗത്ത് അടച്ചതാണ്. ഇടതു നിന്നും വലതു നിന്നും വണ്ടികള്‍ അകത്തേയ്ക്കും പുറത്തേയ്ക്കും വന്നാല്‍ ട്രാഫിക് വേഗം കുറയുമെന്നതാണ് ഇതിനുള്ള കാരണം.

2. കടകളും സ്ഥാപനങ്ങളും ഒന്നും ഹൈ വേയില്‍ ഉണ്ടാവുകയില്ല. അങ്ങനെ ഉണ്ടായാല്‍ ആളുകള്‍ അവിടെ കയറാന്‍ നിര്‍ത്തുമ്പോള്‍ ട്രാഫിക് വേഗം കുറയും എന്നുള്ളതാണിതിന്റെ കാരണം.

3. ഇവയിലെയ്ക്ക് കയറാന്‍ 10-20 കിലോമീ്റ്ററില്‍ ഒരിടത്തെ അവസരം ഉണ്ടാവുകയുള്ളൂ. ഇതു ദീര്‍ഖ ദൂര യാത്രക്കാരെ മാത്രം ഉദ്ദേശിച്ചുള്ളതായതിനാലും പെട്ടെന്ന് വണ്ടികള്‍ കയറുന്നതും ഇറങ്ങുന്നതും ട്രാഫിക് വേഗം കുറയ്ക്കുമെന്നുള്ളതിനാലും ആണ്.

4. ഹൈ വേയ്കള്‍ എപ്പോഴും 2 സ്ഥലങ്ങള്‍ തമ്മില്‍ ഉള്ള ഏറ്റവും കുറഞ്ഞ ദൂരത്തില്‍, ഏറ്റവും നേരെ ഉള്ള രീതിയില്‍ ആണ് പണിയുന്നത്. ഏതെങ്കിലും മന്ത്രിയുടെയോ രാഷ്ട്രീയക്കാരുടെയോ വീട്ടു മുറ്റത്ത്‌ കൂടെ പോകാന്‍ വേണ്ടി വളച്ച് നശിപ്പിക്കേണ്ട ഒന്നല്ല ഇത്. കേരളത്തില്‍ ഉണ്ടാക്കാവുന്ന ഹൈ വേയ്കള്‍ കേരളത്തിന്റെ തെക്കു തൊട്ടു വടക്കു വരെ പോകാവുന്ന ഒന്നാണ് പ്രധാനമായും. കേരള ഹൈ വേ എന്ന പേരില്‍ ഇതു കന്യാകുമാരി മുതല്‍ കാസര്‍കോട് വരെ പണിയാം. പിന്നെ കൊച്ചി-ബാഗ്ലൂര്‍, കൊച്ചി-മദ്രാസ്, മുതലായ അന്തര്‍ സംസ്ഥാന ഹൈ വേയ്കളും. ഇവ വന്നാല്‍ കൊച്ചി ബാഗ്ലൂര്‍ യാത്ര ഇപ്പോഴത്തെ 15 മണിക്കൂറില്‍ നിന്നും 5 മണിക്കൂര്‍ ആയി കുറയും.

5. ഹൈ വേയില്‍ കാല്‍ നടക്കാരും ഫുട് പാത്തും ഉണ്ടാവുകയില്ല.

ഐഡിയ മോബൈല്‍ - ഒരു തട്ടിപ്പ് ഐഡിയ....

2008-04-07T13:23:00.000-07:00

കഴിഞ്ഞ മാസം 31-ആം തീയതി എനിക്ക് അമേരിക്കയ്ക്ക് വിളിക്കേണ്ട ആവശ്യം വന്നു. അത് കൊണ്ട് അന്ന് ഞാന്‍ എന്റെ ഫോണ്‍ കമ്പനിയായ ഐഡിയായുടെ കസ്റ്റമര്‍ സപ്പോര്‍ട്ട് എക്സിക്യൂട്ടീവിനെ വിളിച്ചു. എന്റെ ഭാര്യ സൌദിയിലായത് കൊണ്ട് അമേരിക്കയ്ക്കും സൌദിയ്ക്കും വിളിക്കാന്‍ റേറ്റ് കുറക്കാന്‍ എന്താണ് വഴി എന്ന് ചോദിച്ചു. ആ സഹോദരന്‍ എന്നോട് 79 രൂപയുടെ ചാര്‍ജ് ചെയ്താല്‍ അമേരിക്കയ്ക്ക് മിനിടിനു 1.99 രൂപയും സൌദിക്ക് 7.99 രൂപയും ആകുമെന്ന് പറഞ്ഞു.

അത് കൊണ്ട് ഞാന്‍ 1-ആം തീയതി രാവിലെ ഒരു കടയില്‍ പോയി 79 രൂപയ്ക്ക് ചാര്‍ജ് ചെയ്തു. കടക്കാരന്‍ 80 രൂപയനെന്നു പറഞ്ഞു. പക്ഷെ ഞാന്‍ കസ്റ്റമര്‍ സപ്പോര്‍ട്ട് എക്സിക്യൂട്ടീവിനോട് സംസാരിച്ച ഉറപ്പില്‍ 79 എന്നും പറഞ്ഞു ചാര്‍ജ് ചെയ്യിപ്പിച്ചു. ഉടനെ എനിക്ക് ഒരു ടെക്സ്റ്റ് മെസ്സേജ് വന്നു. അതില്‍ 79 രൂപയ്ക്ക് ചാര്‍ജ് ചെയ്തു എന്നും ബാലന്‍സ്‌ പഴയ തുക തന്നെ ആണെന്നും കാണിച്ചു. വൈകുന്നേരം ആയപ്പോള്‍ കസ്റ്റമര്‍ സപ്പോര്‍ട്ട് എക്സിക്യൂട്ടീവിന്‍റ്റെ പെരുമാറ്റം നന്നയിരുന്നെന്കില്‍ 4001-ലേയ്ക്ക് യേസ് എന്നും അല്ലെന്കില്‍ നോ എന്നും അഭിപ്രായം ടെക്സ്റ്റ് മെസ്സേജ് ചെയ്യാന്‍ പറഞ്ഞു കൊണ്ട് ഒരു മെസ്സേജും കിട്ടി. ഞാന്‍ യേസ് എന്ന് 4001-ലേയ്ക്ക് അയയ്ക്കുകയും ചെയ്തു. അന്ന് രാത്രി അമേരിക്കയ്ക്ക് വിളിച്ചിട്ട് ചാര്‍ജ് നോക്കിയപ്പോള്‍ മിനിട്ടിനു 7 രൂപ വച്ചു പോകുന്നതായി കണ്ടു. വീണ്ടും കസ്റ്റമര്‍ സപ്പോര്‍ട്ട് എക്സിക്യൂട്ടീവിനെ വിളിച്ചു. അവര്‍ എന്നോട് പറഞ്ഞത് 76 രൂപയുടെ ചാര്‍ജ് ആയിരുന്നു 1.99 രൂപയുടെ നിരക്ക് കിട്ടാന്‍ ചെയ്യേണ്ടിയിരുന്നതെന്ന്. തലേന്ന് സംസാരിച്ച കസ്റ്റമര്‍ സപ്പോര്‍ട്ട് എക്സിക്യൂട്ടീവിനു പറ്റിയ തെറ്റു കാരണം ആണിങ്ങനെ ആയതെന്നും അത് കൊണ്ട് അത് ശരിയാക്കി തരണമെന്നും ഞാന്‍ ആവശ്യപ്പെട്ടു. അവര്‍ എനിക്ക് ഒരു കമ്മ്യൂനിക്കേഷന്‍ നമ്പര്‍ തന്നു. പിറ്റേന്നു ഉച്ച ആകുമ്പോളേയ്ക്കും ശരിയായി കിട്ടുമെന്നും രാത്രിയില്‍ വിളിച്ചതിന്റെ ചാര്‍ജ് അഡ്ജസ്റ്റ് ചെയ്തു തരുമെന്നും പറഞ്ഞു.

പിറ്റേന്നു ഉച്ച കഴിഞ്ഞിട്ടും എന്റെ ബാലന്‍സ്‌ പഴയതു തന്നെ. ഞാന്‍ വീണ്ടും വിളിച്ചു കസ്റ്റമര്‍ സപ്പോര്‍ട്ട് എക്സിക്യൂട്ടീവിനെ. പുതിയ ഒരു കമ്മ്യൂനിക്കേഷന്‍ നമ്പര്‍ കിട്ടി. അന്ന് വൈകിട്ട് ഏഴ് മണി ആകുമ്പോളേയ്ക്കും ശരിയാകുമെന്നും എന്നോട് അവര്‍ പറഞ്ഞു. അന്ന് രാത്രി അമേരിക്കയ്ക്ക് വിളിച്ചപ്പോഴും നിരക്ക് പഴയ പടി തന്നെ. ഞാന്‍ വീണ്ടും വിളിച്ചു. അപ്പോള്‍ അവര്‍ പറയുന്നത് അവര്‍ക്കൊന്നും ചെയ്യാന്‍ ഇല്ലെന്ന്. ഞാന്‍ ഐഡിയായുടെ വെബ്സൈറ്റില്‍ കയറി അവരുടെ ഏരിയ മാനേജരുടെ അഡ്രസ്സ് കണ്ടു പിടിച്ച് ഒരു ഇ-മെയില് അയച്ചു. രണ്ടു ദിവസം കഴിഞ്ഞപ്പോള്‍ അവിടെ നിന്നും മറുപടി വന്നു. അവരുടെ ഭാഗത്ത് നിന്നും തെറ്റുകള്‍ ഒന്നും ഇല്ല. അവര്‍ രേഖകള്‍ ചെക്ക് ചെയ്തു എന്നും പറഞ്ഞിരിക്കുന്നു.

ഇതിനിടയ്ക്ക് ഒന്നോ രണ്ടോ മെസ്സേജുകള്‍ വന്നു എന്റെ എല്ലാ പ്രശ്നവും പരിഹരിച്ചിരിക്കുന്നു എന്നും പറഞ്ഞു കൊണ്ട്.

ഇങ്ങനെ ആണെന്കില്‍ അവരുടെ പരസ്യത്തില്‍ ഇതൊരു നല്ല ഐഡിയ എന്നുള്ളത് മാറ്റി ഒരു തട്ടിപ്പ് ഐഡിയ എന്നാക്കി മാറ്റുന്നതായിരിക്കും നല്ലത്.

മധുര മനോഹര മനോജ്ഞ ചൈന!!

2008-04-05T15:41:00.000-07:00

ഇന്നലത്തെ മാതൃഭൂമിയില്‍ പി. ഗോവിന്ദപ്പിള്ളയുടെ വക ഒരു ലേഖനം ഉണ്ടായിരുന്നു. ചൈന ടിബറ്റില്‍ ചെയ്യുന്ന അതിക്രമങ്ങളെ ന്യായീകരിച്ചു കൊണ്ട് ഒരു ലേഖനം. അരുണാചല്‍ പ്രദേശില്‍ ചൈന അതിക്രമിച്ചു കയറിയതിനെ കുറിച്ച് ഒരക്ഷരം മിണ്ടാത്ത സഖാവ്‌ ഇപ്പോള്‍ ചൈനയെ ന്യായീകരിക്കാന്‍ ഇത്രയും വെമ്പല്‍ കൊള്ളുന്നത് കണ്ട് നാമെന്ത് പറയാന്‍ അല്ലേ? ഇനി ചൈന അരുണാചല്‍ പ്രദേശ് കുറച്ചു കൂടി എങ്ങാനും കയ്യേറിയാല്‍ അന്നതിനെ ന്യായീകരിച്ചും സഖാവ്‌ എഴുതിയേക്കാം!! ബാല്ലറ്റ് പേപ്പറില്‍ കൂടി ഇവിടെ വിപ്ലവം വരാത്തത് കൊണ്ട് ഇനി സഖാക്കളുടെ ഒരേ പ്രതീക്ഷ ചൈനയിലാണെന്നു തോന്നുന്നു!!! 1962ലെപ്പോലെ ചൈന ഇന്ത്യയെ ആക്രമിച്ചാലും സഖാവ്‌ അതിന് എന്തെങ്കിലും ന്യായീകരണം കണ്ടെത്തുമായിരിക്കും!! അത് മാത്രമേ ഇന്ത്യന്‍ കമ്മ്യൂണിസ്റ്റ് പാര്ട്ടികള്‍ ഇപ്പോള്‍ വിപ്ലവം വരാന്‍ ഒരു മാര്‍ഗം ആയി കാണുന്നുള്ളൂ!!

ലോകത്തിലെ ആദ്യ പുരുഷ ഗര്‍ഭിണി!!

2008-04-04T13:29:00.000-07:00

നപുംസകമായ ഒരു മനുഷ്യന്‍ ഗര്‍ഭിണി ആയ വാര്‍ത്ത‍ ഇന്നലെ പുറത്തു വന്നു. ഈ സഹോദരന്‍ ജനിച്ചപ്പോള്‍ കക്ഷിക്ക് ആണുങ്ങളുടെ ചില അവയവങ്ങളും പെണ്ണുങ്ങളുടെ ചില അവയവങ്ങളും ഉണ്ടായിരുന്നു. പെണ്ണുങ്ങളുടെ ചില ഭാഗങ്ങള്‍ ഒക്കെ പുള്ളി ശസ്ത്രക്രിയയിലൂടെ നീക്കം ചെയ്തു കളഞ്ഞായിരുന്നു. പക്ഷെ ഗര്‍ഭ പാത്രം പുള്ളി എടുത്തു കളഞ്ഞില്ല. തോമസ് ബീറ്റീ എന്നാണ് ടിയാന്റെ പേര്. തോമസിന്റെ ഭാര്യയുടെ ഗര്‍ഭ പാത്രം നീക്കം ചെയ്തത് കൊണ്ട് ഗര്‍ഭിണി ആകാന്‍ സാധ്യമല്ല. അത് കൊണ്ട് ഈ ദമ്പതികള്‍ തോമസിന്റെ വയറ്റില്‍ വെറുതെ ഇരിക്കുന്ന ഗര്‍ഭ പാത്രം ഉപയോഗിക്കാന്‍ തീരുമാനിച്ചു. കൃത്രിമ ബീജ സങ്കലനത്തിലൂടെ സഹോദരന്‍ ഗര്‍ഭിണി ആയി. ഇപ്പോള്‍ 6 മാസം ഗര്‍ഭവുമായി പുള്ളിക്കാരന്‍ ടീവീയിലും മറ്റും അഭിമുഖങ്ങള്‍ നല്കുന്നു.

കുട്ടിക്ക് മുലപ്പാല്‍ കൊടുക്കുക എന്നുള്ള കാര്യം തോമസിന്റെ കാര്യത്തില്‍ അസാധ്യം ആണ്. അതിന് പകരം കുപ്പിപ്പലോ ബേബി ഫൂഡോ ഒക്കെ നല്‍കാം. പിന്നെ കുഞ്ഞിന്‌ ഒരമ്മയും കൂടി വീട്ടില്‍ ഉണ്ടല്ലോ.

നപുംസകങ്ങള്‍ ആയിട്ടുള്ള മനുഷ്യര്‍ക്ക് എന്തൊക്കെ അവകാശങ്ങള്‍ ഉണ്ടാകാം എന്നുള്ള ചോദ്യം ഇവിടെ ഉയര്‍ന്നു വരുന്നു. മറ്റേത് മനുഷ്യനും ഉള്ള അവകാശങ്ങള്‍ ഇവര്‍ക്കും ഉണ്ട്. കൂടുതല്‍ ചില ശരീര ഭാഗങ്ങള്‍ ഉള്ളത് കൊണ്ട് അവര്‍ക്ക് സാധാരണ മനുഷ്യര്‍ക്ക് ഇല്ലാത്ത ചില കഴിവുകള്‍ ഉണ്ടെന്നു വേണമെങ്കില്‍ പറയാം. അതൊന്നും അവരുടെ കുറ്റം അല്ല. അവര്‍ അങ്ങനെ ആണ് ജനിച്ചത്. അവര്‍ക്ക് നിയന്ത്രിക്കാന്‍ പറ്റാത്ത ഒരു കാര്യം ആണ് അവരുടെ സ്വന്തം ശരീരം.

തോമസിന്റെ കുട്ടി വളര്‍ന്നു വരുമ്പോള്‍ സ്കൂളിലും മറ്റും പരിഹാസ പാത്രം ആകുന്ന സ്ഥിതി വന്നേക്കാം. അത് പക്ഷെ തോമസിന്റെയോ കുട്ടിയുടെയോ കുറ്റമല്ല. അവരെ മനസ്സിലാക്കാന്‍ ആവാത്ത സമൂഹത്തിന്റെ കുറ്റം ആണത്.

22 കാരറ്റും 916 ഉം!!

2008-04-03T15:48:00.000-07:00

ഇതു തമ്മില്‍ ഉള്ള വ്യത്യാസം എന്താണെന്നറിയാമോ? ഒന്നുമില്ല എന്നാണുത്തരം. 22 കാരറ്റ് സ്വര്നത്തില്‍ 91.6 ശതമാനം സ്വര്‍ണം ഉണ്ടായിരിക്കണം എന്നാണ് കണക്ക്. അതാണ് ഈ 916! പിന്നെ ഇവിടെ സ്വര്‍ണ ക്കടകളുടെ പരസ്യത്തില്‍ ഇവര്‍ 916 എന്ന് പറയുന്നത് എന്തിനാണ്. നാം പൊതു ജനത്തിനെ ചുമ്മാ പറ്റിക്കാന്‍ ഒരു പരസ്യ തന്ത്രം മാത്രം. 916 എന്ന് ആഭരണത്തിന്റെ അകത്ത് എഴുതി വെച്ചിട്ടുണ്ടെന്ന് ഉള്ളത് ശരി ആണ്. അത് പക്ഷെ 10 കാരറ്റ് സ്വര്‍ണത്തേലും അങ്ങനെ എഴുതി വെയ്ക്കാന്‍ പറ്റും. അത് കൊണ്ട് അത് 22 കാരറ്റ് ആകുമോ? ഇതൊന്നും ഇല്ലാണ്ട് തന്നെ നമുക്ക് സാമാന്യ ബുദ്ധി കൊണ്ട് ഇവര്‍ ആരും 22 കാരറ്റ് സ്വര്‍ണം വില്‍ക്കുന്നില്ല എന്ന് മനസ്സില്‍ ആക്കാം. ഗള്‍ഫ് രാജ്യങ്ങളില്‍ നിന്നും അമേരിക്കന്‍ ഐക്യ നാടുകളില്‍ നിന്നും കൊണ്ടു വരുന്ന സ്വര്‍ണത്തിന്റെ തിളക്കം ശ്രദ്ധിച്ചു നോക്കിയാല്‍ മനസിലാക്കാം. ഇവിടുത്തെ 22 കാരറ്റിനെക്കാളും തിളക്കം അവിടെ എങ്ങനെ വരുന്നു? ഗള്‍ഫില്‍ മായം ചേര്‍ത്ത് പിടിച്ചാല്‍ കൈ വെട്ടും. അമേരിക്കയില്‍ കട മൊത്തം ഫൈന്‍ ആയിട്ട് പോകും. അത് കൊണ്ട് നല്ല സാധനം കിട്ടും. ഇവിടെ ഒരു പരാതി ആരെങ്കിലും ഇവര്‍ക്കെതിരെ കൊടുത്താല്‍ അവനെ ചിലപ്പം ഇവരുടെ ഗുണ്ടകള്‍ തട്ടിക്കളയാനാണ് സാധ്യത കൂടുതല്‍.

ഇവിടെ നാം സ്ഥിരമായി കാണുന്ന ഒരു സ്വര്‍ണക്കടയുടെ പരസ്യത്തില്‍ നമ്മുടെ ഒരു പ്രശസ്തനായ സിനിമാ താരം പറയുന്നുണ്ട് "916 സ്വര്‍ണാഭരണങ്ങള്ക്ക് ഇന്ത്യയില്‍ എവിടെയും ഒരേ പരിശുദ്ധി ആണ്" ഇതിലൂടെ അവര്‍ തന്നെ സമ്മതിക്കുക ആണ് ഇന്ത്യയില്‍ ഒരിടത്തും 22 കാരറ്റ് സ്വര്‍ണം ആരും വില്‍ക്കുന്നില്ല എന്ന്. ഇന്ത്യയ്ക്ക് മാത്രം ഒരു 22 കാരറ്റ് ഉണ്ടോ? ഇന്ത്യയ്ക്ക് പുറത്തെല്ലാം 22 കാരട്ടില്‍ അവര്‍ നിറം കൂടുതല്‍ ചെര്‍ക്കുന്നതായിരിക്കും അല്ലേ?

കണ്ണൂരിലെ കപട അന്വേഷണങ്ങളും കോടതി ഇടപെടലും

2008-04-02T15:47:00.000-07:00

കണ്ണൂരിലെ കൊലപാതക പരമ്പരകളിലെ കുറ്റവാളികളെ പിടിക്കാനുള്ള പോലീസിന്റെ കഴിവില്ലായ്മയെ കോടതി പല പ്രാവശ്യം വിമര്‍ശിച്ചു കഴിഞ്ഞു . ഒരു കൊലപാതകത്തിലും അത് ആസൂത്രണം ചെയ്ത നേതാക്കന്മാരെ ആരെയും അറസ്റ്റ് ചെയ്തിട്ടില്ല. സ്ഥിരം കുറ്റവാളികള്‍ ആരുടെയെങ്കിലും പുറത്ത് പാര്‍ട്ടിക്കാര് കൂലിക്ക് കുറ്റം കെട്ടി എല്പ്പിക്കുകയാണ് ഇപ്പോള്‍ നടക്കുന്നത്. കുറ്റവാളികളെ പിടിക്കാനുള്ള സ്വാതന്ത്ര്യം പോലീസിന് ഇപ്പോള്‍ ഇല്ല. പാര്‍ട്ടി ആഫീസില്‍ നിന്നും നല്കുന്ന ലിസ്റ്റില്‍ ഉള്ളവരെ പിടി കൂടാന്‍ മാത്രമേ ഇപ്പോള്‍ പോലീസിനു അധികാരം ഉള്ളൂ. അത് മനസ്സിലാക്കിയിട്ട് ആണ് കോടതി ഇപ്പോള്‍ സി. ബി. ഐ. യ്ക്ക് അന്വേഷണം വിട്ടേക്കുമെന്ന് സൂചിപ്പിക്കുന്നത്. ഇതിനെതിരെ കോടതിയുടെ അതിരു കടക്കുന്നു എന്നൊക്കെ പറഞ്ഞു ഇനിയുള്ള ദിവസങ്ങളില്‍ സഖാക്കളുടെ പ്രസ്താവനകള്‍ കാണും.

കള്ള് കുടിക്കും!! പക്ഷേ രഹസ്യമായി!!

2008-04-01T14:45:00.000-07:00

ഇതു മലയാളിയുടെ മാത്രം ഒരു പ്രത്യേകത ആണെന്ന് തോന്നുന്നു. നല്ല ഒരു ശതമാനം ആള്‍ക്കാരും മദ്യപിക്കും. പക്ഷേ എല്ലാവരും ഒളിച്ചും പാത്തും എന്തോ കൊലപാതകം ചെയ്യുന്നത് പോലെ ആണ് ചെയ്യുന്നത്. ബെവെറേജസില്‍ മേടിക്കുന്നിടത്തും കുപ്പി കയ്യില്‍ കിട്ടിയാല്‍ ആദ്യം ചെയ്യുന്നത് അണ്ടര്‍ വെയറിന്റെ അകത്തു കയറ്റുകയോ മുണ്ടിന്റെയോ പാന്റ്സിന്റെയോ അകത്ത് ഒളിപ്പിക്കുകയോ ആണ്. വേറെ ചില മാന്യന്മാര്‍ ഉണ്ട്. അവര്‍ കടയുടെ 100 മീറ്റര്‍ അകലെ വന്നു വണ്ടി കിടത്തിയിട്ട് അവിടുള്ള ഏതെങ്കിലും ലോക്കല്‍ ഗുണ്ടയെ കൊണ്ടു മേടിപ്പിക്കും. അവനും കിട്ടും ഒരു ചെറുതോ വലുതോ പത്തു രൂപയോ ഒക്കെ. അവനും ജീവിച്ചും കള്ളടിച്ചും പോകണമല്ലോ! ക്യൂവില്‍ നില്‍ക്കുക എന്നുള്ളത് നമുക്കു സ്വതവേ അലര്‍ജി ആയിട്ടുള്ള ഒരു കാര്യം ആണ്. ബെവെറേജസിലെ ക്യൂവിലും സ്ഥിതി വ്യത്യസ്തമല്ല. മുമ്പില്‍ ഒരാളെ ഉള്ളെങ്കില്‍ പോലും അവനെ കൊണ്ടു മേടിപ്പിക്കാന്‍ നോക്കും. ഒരു മിനിട്ട് താമസിച്ചാല്‍ ആകാശം ഇടിഞ്ഞു വീഴുമെന്നു തോന്നും.

കല്ല്യാണങ്ങളിലും മറ്റു പാര്‍ട്ടികളിലും ഈ സ്വഭാവം നമുക്കു കാണാം. മദ്യം എപ്പോഴും എവിടെയെങ്കിലും ഒളിച്ചും പാത്തും ആണ് കഴിക്കുന്നത്. ഇത് മനുഷ്യര്‍ രുചിച്ച് ആസ്വദിച്ച് കഴിക്കുന്ന ഒരു സാധനം ആണെന്ന് ആരും മനസ്സില്‍ ആക്കുന്നില്ല. ചുമ്മാ പശു വെള്ളം കുടിക്കുന്ന പോലെ വലിച്ചു കയറ്റുകയാണ്. വേറെ ആരും കാണാതെ പെട്ടെന്ന് അടിക്കാന്‍ ഉള്ള ധൃതിയില്‍ ആണ് ഇതെന്ന് തോന്നുന്നു.

ബസില്‍ കയറും മുമ്പേ മണിയടിക്കുന്നത്!!

2008-03-31T15:47:00.000-07:00

മിക്കപ്പോഴും കാണാറുള്ള ഒരു കാഴ്ച്ചയാണിത്. ബസില്‍ യാത്രക്കാര്‍ കയറും മുമ്പേ മണിയടിക്കുന്നത്. പ്രത്യേകിച്ചും പ്രായമായ സ്ത്രീകളും മറ്റും കയറി കയ് പിടിക്കും മുമ്പേ വണ്ടി മണി അടിച്ച് വിടുന്നത്. മിക്കവാറും കിളികള്‍ 16 - 18 വയസ് ഉള്ളവര്‍ ആയിരിക്കും. അവര്‍ക്ക് ഈ വൃദ്ധരുടെ ബുദ്ധി മുട്ടൊന്നും ഒരു പ്രശ്നമേയല്ല. ഇവരെ ഒക്കെ ഒന്നു മര്യാദക്കാര്‍ ആക്കി എടുക്കാന്‍ സര്‍ക്കാരിനും മറ്റും എന്തെങ്കിലും ചെയ്തു കൂടേ?

ഭാര്യയെ ഭര്‍ത്താവിന് വീട്ടില്‍ നിന്നും അടിച്ചിറക്കാമോ?

2008-03-24T12:36:00.000-07:00

വിവാഹത്തോടെ ഭാര്യയ്കും ഭര്‍ത്താവിനും ഉള്ള സ്വത്തില്‍ തുല്ല്യ അവകാശം ഉണ്ടാവണം. ചില ഭവനങ്ങളില്‍ ഭര്‍ത്താവും ചില ഭവനങ്ങളില്‍ ഭാര്യയും കൂടുതല്‍ സമ്ബാതിക്കുന്നതിനാല് ഒരു വിവാഹ മോചനം ഉണ്ടായാല്‍ ഏതെങ്കിലും കൂട്ടര്‍ക്ക് നഷ്ടം സംഭവിക്കും. അത് പക്ഷെ വിവാഹത്തിന്റെ ഒരു പൊതു സ്വഭാവം ആണ്. രണ്ടു കൂട്ടരും ഒരേ പോലെ ആകുക എന്ന് പറയുന്നത് അസംഭവ്യം ആണ്. കേരളത്തിലെ സ്ഥിതി വച്ച് മിക്ക ഭര്‍ത്താക്കന്മാരും അപ്പന്റെ/അമ്മയുടെ വീട്ടിലാണ് കഴിയുന്നത്. അത് കൊണ്ട് അവര്‍ക്ക് സ്വന്തം ആയി ഒരു വീട് ഉണ്ടെന്ന്‍ പറയാന്‍ വയ്യ. പക്ഷെ അവര്‍ക്ക് അവിടുന്ന് സ്വന്തം ഭാര്യയെ ഇറക്കി വിടുവാന്‍ അവകാശം ഉണ്ടോ? അമ്മായി അപ്പനും അമ്മായി അമ്മയും വിചാരിച്ചാല്‍ നടക്കുമായിരിക്കും. പക്ഷെ ഭര്‍ത്താവിന് അതിനധികാരം ഉണ്ടോ? ഇല്ല എന്നാണ് എന്റെ അഭിപ്രായം. ഭര്‍ത്താവിന്റെ അച്ഛനും അമ്മയും ഭാര്യയുടെ കൂടെ നില്ക്കാന്‍ സാധ്യത ഇല്ലാത്തതിനാല്‍ ഭാര്യയ്ക്ക് ഇവിടെ വിവേചനം നേരിടേണ്ടി വരുന്നു. ഇക്കഴിഞ്ഞ ദിവസം ഉണ്ടായ സംഭവത്തില്‍ കോടതിയുടെ ഉത്തരവുണ്ടായിട്ടും വീട്ടില്‍ നിന്നും ഇറക്കി വിടപ്പെട്ട ശേഷം പോലീസ് സംരക്ഷണയോടെ വീട്ടില്‍ കയറി താമസിച്ച ഭാര്യയ്ക്ക് ഭര്‍ത്താവിന്റെയും അമ്മായിയമ്മയുടെയും കയ്യില്‍ നിന്നും നേരിട്ട മര്‍ദ്ധനം ഇക്കാര്യത്തില്‍ കേരളത്തില്‍ ഉള്ള പരാധീനതകള്‍ കാണിക്കുന്നു. കോടതികളുടെ ഉത്തരവ് പോലും പാലിക്കാതെ വരുമ്പോള്‍ നമ്മുടെ നീതി ന്യായ വ്യവസ്ഥകള്‍ക്ക് പുല്ല് വിലയാണ് സമൂഹം കല്പ്പിക്കുന്നത് എന്ന് വരുന്നു. ഇങ്ങനെ കോടതി അലക്ഷ്യം നടത്തുന്നവരെ ജാമ്മ്യമില്ലാതെ ജയിലില്‍ ആക്കുവാനോ മാനസിക രോഗശുപത്രിയില്‍ സ്ഥിരമായി ആക്കുവാനോ ഉള്ള നടപടികള്‍ വന്നാലേ നമ്മുടെ സ്ത്രീകള്‍ക്ക് സുരക്ഷിതത്വം ഉണ്ടാവുകയുള്ളൂ.

ടിബറ്റ് മാത്രം ചൈനയുടെ ആഭ്യന്തര കാര്യം!!

2008-03-22T01:49:00.000-07:00

എ ബി ബര്‍ധന്റെ വക ഒരു പ്രസ്താവന ഇന്നുണ്ടായിരുന്നു. ടിബറ്റ് ചൈനയുടെ ആഭ്യന്തര കാര്യമാണെന്ന്!!! സൂര്യന്റെ കീഴില്‍ ഉള്ള എല്ലാ കാര്യത്തെയും കുറിച്ച് അഭിപ്രായം പറയുന്ന സഖാവിനു ചൈനയുടെ കാര്യത്തില്‍ മാത്രം ഒരു നിക്ഷിപ്ത താത്പര്യം ഉണ്ടെന്നു തോന്നുന്നു.

സര്‍ക്കാര്‍ സ്കൂളുകളും പ്രൈവറ്റ് സ്കൂളുകളും പിന്നെ KSKTU യും!

2008-03-21T04:21:00.000-07:00

കഴിഞ്ഞ ദിവസങ്ങളില്‍ സര്‍ക്കാര്‍ എടുത്ത തീരുമാനം അനുസരിച്ച് പണിയില്ലാത്ത കുറച്ചു പ്രൊട്ടക്ടഡ് അദ്ധ്യാപകരെ പഞ്ചായത്തുകളിലേയ്ക്ക് മാറ്റുമെന്ന് കണ്ടു. അതിനെതിരെ പ്രതിഷേധം പ്രകടിപ്പിച്ചു കൊണ്ട് KSKTU നേതാക്കളുടെ വക പ്രസ്താവനയും ഉണ്ടായിരുന്നു. "വിദ്ധ്യാര്‍ത്തികള് കുറഞ്ഞു പോകുന്നത് അധ്യാപകരുടെ പ്രശ്നം അല്ല." അദ്ധ്യാപകര്‍ നന്നായി, പ്രൈവറ്റ് സ്കൂളുകള്‍ പഠിപ്പിക്കുന്നത് പോലെ പഠന കാര്യങ്ങളിലും മറ്റും ശ്രദ്ധ കൊടുത്തിരുന്നെങ്കില്‍ വിദ്ധ്യാര്‍ത്തികള് കൊഴിഞ്ഞു പോവുക ഇല്ലായിരുന്നു. അതു കൊണ്ട് മോശം സര്‍ക്കാര്‍ സ്കൂളുകളുടെ ഉത്തരവാദിത്വം അതിന്റെ അധ്യാപകര്‍ക്കും അവിടുത്തെ മാനേജമെന്റിനും ആണ്. നന്നായി ജോലി ചെയ്യാത്ത ഇവര്‍ക്ക്‌ പ്രൊട്ടക്ഷന്‍ കൊടുക്കുന്നതിനു പകരം ജോലിയില്‍ നിന്നും പറഞ്ഞു വിടുക ആണ് വേണ്ടത്. അധ്യാപനത്തില്‍ കയറിക്കഴിഞ്ഞാല്‍ ഇറങ്ങുന്നത് വരെ ജോലി സ്ഥിരത ഇല്ലെന്ന അവസ്ഥ വന്നാലെ നന്നായി പഠനവും പഠനേതര കാര്യ പരിപാടികളും നന്നായി നടക്കുകയുള്ളൂ. കൂടുതല്‍ ശമ്പളം കിട്ടുന്നത് കൊണ്ട് സര്‍ക്കാര്‍ സ്കൂളുകളിലെ പ്രകടനം നന്നാകുന്നില്ല. അതിന്റെ പകുതി ശമ്പളം വാങ്ങുന്ന അധ്യാപകരുള്ള പ്രൈവറ്റ് സ്കൂളുകള്‍ ആണ് മെച്ചപ്പെട്ട പ്രകടനം നടത്തുന്നത്.

റ്റിബെറ്റും ഡാര്‍ഫൂറും മ്യാന്മാറും ഗള്‍ഫും പിന്നെ കുറച്ചെണ്ണയും!

2008-03-16T02:14:00.000-07:00

ഇവ തമ്മില്‍ എന്ത് ബന്ധം ആണുള്ളത്? ചൈന റ്റിബെറ്റില്‍ ബുദ്ധ ഭിക്ഷുക്കളെയും സ്വാതന്ത്ര സമരക്കാരെയും അടിച്ചൊതുക്കുന്നു. ഡാര്‍ഫൂറില് അവിടുത്തെ ഭരണാധികാരികളുടെ മൗന സമ്മതത്തോടെ ജന്‍ജവീഡുകള് നടത്തുന്ന ആക്രമണത്തില്‍ ലക്ഷങ്ങള്‍ ഇതിനകം മരിച്ചു കഴിഞ്ഞു . അവിടുത്തെ ഭരണാധികാരികള്‍ക്ക് ആയുധം വില്‍ക്കുന്നത് ചൈന ആണ്. അവിടുന്ന് കിട്ടുന്ന പെട്രോളിനായി ചൈന ഈ മനുഷ്യ കുരുതിക്ക് നേരെ കണ്ണടക്കുകയാണ്. അതെ പോലെ തന്നെ ഇന്ത്യയും മ്യാന്മാറില്‍ ആംഗ് സാന്‍ സൂചിയുടെ നേതൃത്വത്തില്‍ നടക്കുന്ന സ്വാതന്ത്ര്യ സമരത്തെ അടിച്ചൊതുക്കുന്ന പട്ടാള നേതൃത്വത്തിന് നേരെ അവിടെ നിന്നും കിട്ടുന്ന പെട്രോളിനായി കണ്ണടക്കുകയാണ്. പെട്രോളിനായി അമേരിക്ക ഗള്‍ഫ് രാജ്യങ്ങളിലെ രാജ ഭരണങ്ങളെ പിന്തുണക്കുന്നത് പോലെ തന്നെ അവസരവാദപരമായ ഒരു നിലപാട് ആണിത്. എണ്ണയ്ക്ക് വേണ്ടി എന്ത് തോന്ന്യവാസവും കണ്ണടക്കും എന്ന നിലപാട് ആണീ രാജ്യങ്ങളെല്ലാം എടുക്കുന്നത്. ഇതില്‍ നമ്മുടെ കമ്മ്യൂണിസ്റ്റ് പാര്‍ട്ടികള്‍ കാണുന്നത് അമേരിക്കയുടെ ഭാഗം മാത്രമേ ഉള്ളൂ. അമേരിക്ക കാണുന്നത് ചൈനയുടെ ഭാഗം മാത്രവും. ഇന്ത്യാ സര്‍ക്കാര്‍ ആകട്ടെ ഇതൊന്നും കാണുന്നുമില്ല.

അമേരിക്കന്‍ സാമ്രാജ്യത്വവും വാലന്റൈന്‍സ്‌ ഡേയും!

2008-03-07T22:49:00.000-08:00

ഇക്കഴിഞ്ഞ ദിവസം നമ്മുടെ ഒരു ധീര സഖാവ്‌ ദുഖിക്കുന്നത് കെട്ട്. പണ്ട് അമേരിക്കയുടെ വിയട്നാം അധിനിവേശത്തിനെതിരെ സമരം ചെയ്തിടത്ത് ഇപ്പോള്‍ യുവാക്കള്‍ വാലന്റൈന്‍സ്‌ ഡേ ആണ് ആഘോഷിക്കുന്നത്. അത് പൊതു ജനത്തിനു കുറച്ചു വിവരം ഉണ്ടായതിന്റെ ലക്ഷണം ആയി കണ്ടാല്‍ മതി. ഒരു പ്രയോജനവുമില്ലാത്ത കുറെ അമേരിക്കന്‍ സാമ്രാജ്യത്വ വിരുദ്ധ പ്രകടനങളും സദ്ദാം ഹുസ്സൈനെ രക്ഷിക്കാനായി നടത്തിയ പ്രയോജന ശൂന്യമായ ബന്ദുകളും നിര്‍ത്തി സ്വന്തം ആയി ഒരു കാമുകനെയോ കാമുകിയെയോ കിട്ടുന്ന ഈ പരിപാടിയിലേയ്ക്ക് മാറുകയെന്നത് കുറച്ചെങ്കിലും പ്രയോജനകരമായ ഒരു കാര്യം ആണ്. വാലന്റൈന്‍സ്‌ ഡേ വഴി കുറേ ഞരമ്പു രോഗികളുടെ എണ്ണം ഇവിടെ കുറയുകയും അങ്ങനെ ഇവടെ സ്ത്രീകള്‍ക്ക് കുറച്ചു കൂടി മന സമാധാനത്തോടെ ബസില്‍ യാത്ര ചെയ്യാനും പറ്റും. ഇവിടുത്തെ ആത്മ ഹത്യകളുടെ എണ്ണം കുറയുകയും ചെയ്യും.

ഇസ്രായേലും ഇന്ത്യയും തമ്മില്‍ ശത്രുതയോ?

2008-03-07T08:58:00.000-08:00

ഇന്നലെ പ്രകാശ്‌ കാരാട്ടിന്റെ വകയായി ഒരു പ്രസ്താവന ഉണ്ടായിരുന്നു. "ഇസ്രായേലും ഇന്ത്യയും തമ്മില്‍ നയതന്ത്ര ബന്ധം അവസാനിപ്പിക്കണം". കാരാട്ടിന്റെ ഈ പ്രസ്താവനയുടെ ലക്ഷ്യം എന്താണോ ആവോ? മുസ്‌ലിം വോട്ട് ബാങ്ക് ആവാനെ തരമുള്ളൂ!! ചൈന അരുണാചല്‍ പ്രദേശിലും മറ്റു വടക്കു കിഴക്കന്‍ സംസ്ഥാനങ്ങളിലും നുഴഞ്ഞും അതിക്രമിച്ചും കയറുന്നതിനെപ്പറ്റി സഖാവിന് ഒന്നും പറയാനില്ല. ഒരു കമ്മ്യൂണിസ്റ്റ് രാജ്യം നമ്മോട് എന്ത് പോക്രിത്തരം ചെയ്താലും ക്ഷമിച്ചു കൊടുത്തേക്കാമെന്നായിരിക്കും!! ഇസ്രായേലില്‍ ജനാധിപത്യം നന്നായി പോവുന്നത് കണ്ടിട്ട് സഖാവിന് ഒട്ടും സഹിക്കുന്നില്ലായിരിക്കും എന്ന് തോന്നുന്നു. സഖാക്കളുടെ ധീര നേതാക്കള്‍ എന്ന് പറയുന്നത് സദ്ദാം ഹുസ്സൈനെയും സ്റ്റാലിനെയും ഹ്യൂഗോ ഷാവെസിനെയും വ്ലാദിമിര്‍ പുടിനെയും പോലുള്ള സ്വേച്ചാധിപതികള്‍ ആണല്ലോ. ഇസ്രായേലിനു ചുറ്റും ഉള്ള ശത്രുക്കള്‍ സ്ഥിരമായി അവരെ ആക്രമിച്ചു കൊണ്ടിരിക്കുന്നു എന്നുള്ള കാര്യം വിസ്മരിച്ചു കൊണ്ട് പാലെസ്തീന്‍ കാരെ മാത്രം പൊക്കിപ്പിടിച്ച് കൊണ്ടു നടക്കുന്നത് ശരിയായ കാര്യം അല്ല. ഇസ്രയേല്‍ പല പ്രാവശ്യം സമാധാനത്തിനായി നടത്തിയ ശ്രമങ്ങളെയും നിരസിച്ചു കൊണ്ട് അക്രമത്തിന്റെ ഹമാസ് ഭാഷയില്‍ മുന്നേറുന്ന പാലെസ്തീന്‍കാരോട് എനിക്ക് അത്ര വല്യ സഹതാപം ഒന്നും ഇല്ല.

നികുതി നിരക്കുകളും കമ്മ്യൂണിസവും മുതലാളിത്തവും!

2008-03-06T08:46:00.000-08:00

ഇന്നു നമ്മുടെ ധന കാര്യാ മന്ത്രി നിയമ സഭയില്‍ അവതരിപ്പിച്ച ബഡ്ജറ്റില്‍ ആശുപത്രി ചികിത്സ നേടുന്നവര്‍ക്കും മരുന്നുകള്‍ക്കും നികുതി കൂട്ടുന്നതായി കണ്ടു. അപ്പോളാണ് മരുന്നിനും ഇവിടെ തൊഴിലാളി വര്‍ഗത്തിന്റെയും പാവങ്ങളുടെയും ഈ സര്‍ക്കാറും നികുതി പിരിക്കുന്നുണ്ടെന്ന കാര്യം എന്റെ ശ്രദ്ധയില്‍ പെട്ടത്. മുതലാളിത്തത്തിന്റെ പ്രതീകമായി കമ്മ്യൂണിസ്റ്റുകാര്‍ എപ്പോഴും പുച്ച്ചിച്ചു തള്ളുന്ന അമേരികന്‍ സര്ക്കാര്‍ അവിടെ മരുന്നിനും ആശുപത്രി ചെലവിനും അവശ്യ ഭക്ഷണ സാധനങ്ങള്‍ക്കും നികുതി പിരിക്കുന്നില്ലെന്ന കാര്യം എന്റെ ഓര്‍മ്മയില്‍ പെട്ടത്. വേറെ ഒരു കാര്യം വല്യ കടകള്‍ക്ക് സര്‍ച്ചാര്ജ് ഏര്പ്പെടുത്തുന്നതാണ്. വില കുറയ്ക്കാന്‍ ഏറ്റവും സഹായിക്കുന്ന ഒരു വിഭാഗം ആണ് റിലയന്‍സ്‌ പോലുള്ള കടകള്‍. അവര്‍ എല്ലാ സാധനത്തിനും നികുതി പിരിച്ചിട്ടിട്ടും പല സാധനങ്ങള്‍ക്കും മറ്റു കടകളെക്കാളും വില കുറച്ചാണ് വില്‍ക്കുന്നത്. ചെറു കടകള്‍ എപ്പോഴും നികുതി വെട്ടിച്ചാണ് കച്ചവടം ചെയ്യുന്നത്. അവിടെ സര്‍ച്ചാര്ജ് ഏര്‍പ്പെടുത്തുന്നത് വഴി സാധാരണക്കാരന്റെ ഭാരം വീണ്ടും കൂട്ടാനാണ് സര്‍ക്കാര്‍ ശ്രമിക്കുന്നത്.

കര്‍ഷക കടം എഴുതി തള്ളലും ജാതി അടിസ്ഥാനത്തിലുള്ള സംവരണവും

2008-03-02T00:12:00.001-08:00

തിരഞ്ഞെടുപ്പ് വരുന്നതു കൊണ്ടുള്ള ഒരു രാഷ്ട്രീയ സോപ്പ് ആണിതെന്നു സാമാന്യ ബോധം ഉള്ള ആര്ക്കും മനസ്സിലാകും. ചില വിളകള്‍ കൃഷി ചെയ്യുന്ന കര്‍ഷകര്‍ കാലവസ്ഥ കൊണ്ടും മറ്റു പല കാരണങ്ങള്‍ കൊണ്ടും ബുദ്ധിമുട്ടിലാണെന്നത് ഒരു യാഥാര്‍ത്ഥ്യം ആണ്. പക്ഷേ അത് പോലെ തന്നെ ശരിയായ മറ്റൊരു കാര്യം ആണ് സമ്പന്നരായ ചില കര്‍ഷകര്‍ ഉണ്ടെന്നുള്ളത്. 2.5 ഹെക്ടര്‍ ഉള്ള പുകയില, കുരുമുളക്, റബ്ബര്‍, ഇഞ്ചി കര്‍ഷകര്‍ മിക്കവാറും പേരും വളരെ നല്ല സാമ്പത്തിക നിലയില്‍ ഉള്ളവരാകണം. പുകയില വളരെ നല്ല ലാഭമുള്ള കൃഷി ആണ്. റബ്ബറിനും കുരുമുളകിനും ഇഞ്ചിക്കും മറ്റും ഇപ്പോള്‍ നല്ല വില ഉള്ള സമയം ആണ്. പിന്നെ ഇതിനിടക്ക് കേടു മൂലമോ പ്രകൃതി ശല്ല്യം മൂലമോ സ്വന്തം അനാസ്ഥ കൊണ്ടോ ഒക്കെ നഷ്ടം വരുന്നവരുണ്ടാകും. അവരെ സഹായിക്കേണ്ടത്‌ സര്ക്കാരിന്റെ ഉത്തരവാദിത്വമാണ്. പക്ഷെ ബാക്കിയുള്ള സമ്പന്നന്മാരായ കര്‍ഷകര്‍ക്കും വാരിക്കോരി കൊടുക്കുന്നത് ശരിയായ നടപടി അല്ല. അര്ഹരായവര്‍ക്ക് കൊടുക്കണം.

നമ്മുടെ ഇപ്പോഴത്തെ ജാതി അടിസ്ഥാനത്തില്‍ ഉള്ള സംവരണവും ഇതു പോലെയാണ്. പാവപ്പെട്ട കുടുംബങ്ങളില്‍ നിന്നും വരുന്ന കുട്ടികള്‍ക്ക് നല്ല സൗകര്യങ്ങള്‍ ഉള്ള വീട്ടില്‍ നിന്നും വരുന്ന കുട്ടികളെ പ്പോലെ പഠിത്തത്തില്‍ മുന്നേറാന്‍ ആവുകയില്ല. മാതാപിതാക്കളുടെ വിദ്യാഭ്യാസ നിലവാരവും ഇതില്‍ ഒരു പരിധി വരെ പങ്കു വഹിക്കുന്നുണ്ട്. അര്ഹരായവര്‍ക്ക് ജാതിയും മതവും നോക്കാതെ വിദ്യാഭ്യാസ വായ്പകളും സ്കോളര്‍ഷിപ്പുകളും കൊടുക്കുകയും മൂന്നു നേരം ഭക്ഷണം കഴിക്കാന്‍ കൊടുക്കുകയും ആണ് സര്‍ക്കാര്‍ ചെയ്യേണ്ടത്. വിശക്കുന്ന വയറുമായി ആര്‍ക്കും പഠിക്കാന്‍ സാധിക്കുകയില്ല. അല്ലാണ്ട് മതത്തെയോ ജാതിയെയോ നോക്കി അവര്‍ക്കായി സംവരണം ഏര്‍പ്പെടുത്തുക അല്ല വേണ്ടത്.

പാസ്പോര്‍ട്ട് ഓഫീസിലെ റൊട്ടിക്കഷണം!!

2008-03-01T08:30:00.000-08:00

ഇക്കഴിഞ്ഞ ദിവസം എനിക്ക് പാസ്പോര്‍ട്ട് ഓഫീസ് വരെ പോകേണ്ടി വന്നു. ആദ്യ ദിവസം ചെന്നപ്പോള്‍ പുറത്തിരിക്കുന്ന ഒരാളെ കൊണ്ട് ആപ്ലിക്കേഷന്‍ പൂരിപ്പിച്ചു. 70 രൂപ അങ്ങനെ പോയി. അയാള് സ്ഥിരം ചെയ്യുന്നത് കൊണ്ട് എക്സ്പേര്‍ട്ട് ആയിരിക്കും എന്ന് കരുതി കാര്യമായി ശ്രദ്ധിച്ചില്ല. അകത്തു കയറി ക്യൂവില് നില്ക്കുമ്പോള്‍ ആണ് ശ്രദ്ധിച്ചത് പലേടത്തും അയാള്‍ NIL എന്നും N/A എന്നും ആണ് എഴുതി വിട്ടിരിക്കുന്നത്. എന്റ്റെ പഴയ പാസ്പോര്‍ട്ടില്‍ മുമ്പേ ഉള്ള പല കാര്യങ്ങളും അയാള്‍ നോക്കാതെ എളുപ്പത്തിനായ് ഇങ്ങനെ ചെയ്തു വിട്ടിരിക്കുവാണ്.

അടുത്ത രസകരമായ ഭാഗം ക്യൂവിലെ തള്ളും തിരക്കുമാണ്. സൊമാലിയയില് ഒരു റൊട്ടിക്കഷണം ചെന്നാല് എങ്ങനെ ഇരിക്കും എന്ന് ചോദിച്ചു കേട്ടിട്ടുണ്ടെങ്കിലും ആ ദൃശ്യം കണ്മുമ്പില്‍ കാണുവാന്‍ അവസരം ലഭിച്ചതിപ്പോള്‍ ആണ്. സ്ത്രീകള്‍ ഒക്കെ ഇടിച്ചു കയറുന്നത് കാണേണ്ട കാഴ്ച ആയിരുന്നു. അതിന്റ്റെ ഇടയ്ക്ക് ക്യൂവില്‍ നില്ക്കാന് കഴിയാതെ നേരെ മുമ്പില്‍ ചെന്നു തള്ളിക്കയറാന്‍ നോക്കുന്ന വിരുതന്മാരും, സ്ത്രീകള്‍ ആയതു കൊണ്ട് ആളുകള്‍ പുറകില്‍ പോയി നില്ക്കാന്‍ പറയാന്‍ മടിക്കും എന്ന അറിവ് ദുരുപയോഗിച്ച് ഇടയ്ക്ക് നുഴഞ്ഞു കയറുന്ന തരുണീ മണികളെയും കണ്ടു.

വീണ്ടും പാസ്പോര്‍ട്ട് കൈപ്പറ്റാന്‍ ഒരു ദിവസം ഉച്ച കഴിഞ്ഞു ചെന്നു. ഇതിനായ് അവിടുത്തെ ഓഫീസര്മാര്‍ ആള്‍ക്കാരുടെ പേര് മൈക്കില്‍ കൂടെ അനൌണ്‍സ് ചെയ്യുകയാണ്. ആ സമയം പേരു വിളിക്കുന്നവര്‍ മുമ്പില്‍ ചെന്നു സമാധാനമായി മേടിച്ചാല്‍ മതി. അതും ചെയ്യുവേല. കുറെ പേര് മുമ്പില്‍ പോയി ഇടിച്ചു കൂടി നില്ക്കുകയാണ്. അവിടെ നിന്നും സ്വല്പം പുറകോട്ടു മാറി നിന്നാല്‍ ആരെന്‍കിലും അവരുടെ വിലയേറിയ പാസ്പോര്‍ട്ട് അടിച്ച് മാറ്റുമെന്ന ഭീതി ഉള്ള പോലെ!! ഓഫീസര്മാര്‍ ആളുകളോട് പുറകോട്ടു മാറി നില്ക്കാന്‍ ഇടക്കിടക്ക് അഭ്യര്തിക്കുന്നുണ്ട്. എന്ത് ഫലം!! പാസ്പോര്‍ട്ട് മേടിക്കാന്‍ വരുന്നവര്‍ ഇവരുടെ ഇടയ്ക്ക് കൂടെ തിക്കി തിരക്കി കയറി ചെല്ലണം. ഇങ്ങനെ വരുന്ന സ്ത്രീകളുടെ സ്പര്ശനസുഖമേല്ക്കാനുള്ള ഞരമ്പ് രോഗികളുടെ ശ്രമമാണോയെന്നു എനിക്ക് സംശയം തോന്നി. മുമ്പില് നില്ക്കുന്നവര്‍ മിക്കവരും പുരുഷന്മാര്‍(അതോ പരുഷന്മാരോ?) ആണ് താനും.

ബഡ്ജെറ്റും അതില് നികുതി വര്ധിപ്പിക്കാത്തതിന്റെ ചിലരുടെ നിരാശയും!!!

2008-02-29T11:59:00.000-08:00

ഇന്നത്തെ ചിദംബരത്തിന്റെ ബഡ്ജെറ്റവതരണവും അതിനെ പറ്റിയുള്ള ചര്ച്ചകളും കുറച്ചു നേരം കണ്ടിരുന്നു. പാര്ട്ടി ചാനലില് ഒരു സഹോദരന് വന്നു പണക്കാരുടെ നികുതി ഉയര്ത്താത്തതിനെപറ്റി പരാതി പറയുന്നതു കണ്ടു. ഇപ്പോള് തന്നെ ലോകത്തില് ഏറ്റവും കൂടുതല് നികുതി കൊടുക്കുന്ന പണക്കാര് ഉള്ളതിവിടെ ആണ്. ഇനിയും നികുതി കൂട്ടിയാല് പണക്കാര് ഒക്കെ വേറെ ഏതെങ്കിലും രാജ്യത്ത് പോയി താമസിക്കും. അപ്പോള് നമുക്കിപ്പോള് കിട്ടുന്നത് പോലും ഇല്ലടതാകും എണ്ണ കാര്യം ഇവര്ക്ക് മനസ്സില് ആവാത്തതെന്താണോ ആവോ? JRD ടാറ്റാ പണ്ട് സ്വിറ്റ്സര്ലന്ഡില് ആയിരുന്നു ജീവിച്ചിരുന്നതെന്ന കാര്യം ഓര്ത്താല് അത് മനസ്സില് ആക്കാവുന്നതെ ഉള്ളൂ. പണക്കാര് ഇവിടെ താമസിക്കുമ്പോള് അവര് ബാക്കിയുള്ളവരെക്കാളും കൂടുതല് പൈസ ചിലവാക്കുന്നുണ്‍ട് എണ്ണ കാര്യം മനസ്സിലാക്കണം. അപ്പോള് അതിനനുസരിച്ച് നികുതിയും കൂടുതല് കിട്ടുന്നുണ്ട്. ഒന്നാമതെ നമ്മുടെ റോഡിന്റെ സ്ഥിതി ഒക്കെ കണ്ടാല് ഇങ്ങോട്ട് ആളുകള് വരാന് മടിക്കും. അതിന്റെ മുകളില് ലോകത്തില്ലാത്ത നികുതിയും കൂടെ അടിച്ചേല്പ്പിച്ചാല് കേമമായി.

കുത്തക മുതലാളിമാരും പാവം മലയാളികളും!!

2008-02-24T12:50:00.000-08:00

കുത്തക മുതലാളിമാര് വരുന്നേ എന്നും പറഞ്ഞുകൊണ്ട് ഇവിടുത്തെ കച്ചവടക്കാര് സമരം തുടങ്ങിയിട്ട് കുറച്ചു നാളായി. വിമാന ടിക്കറ്റ് ഒക്കെ എടുത്തു ഡല്ഹിയില് ഒക്കെ പോയാണ് സമരം. അതില് നിന്നും ഈ പാവങ്ങളുടെ വരുമാനം എത്ര ഉണ്ടെന്നു നമുക്കു മനസിലാക്കാം!! ഇപ്പോള് ഇവിടെ ഒരു കടയില് ചെന്നാല് നമുക്ക് അവര് എടുത്തു തരുന്ന സാധനം എടുക്കുക അല്ലാണ്ട് യാതൊരു രക്ഷയും ഇല്ല. അവര് വില്ക്കുന്നതോ ഏറ്റവും മോശം സാധനവും. കാരണം അതിനാണ് കൂടുതല് കമ്മീഷന് കിട്ടുന്നത്. വേറൊന്നും അവര്ക്ക് അറിയണ്ട. മിക്കവാറും കടകളില് തൊഴിലാളികള് എല്ലാം മുതലാളിയുടെ ബന്ധുക്കാര് ഒക്കെ തന്നെ ആയതു കൊണ്ട് ആരും ഇക്കാര്യം ഒന്നും പുറത്ത് അറിയുന്നുമില്ല. റിലയന്സ് അല്ലെന്കില് വാല്മാര്ട്ട് പോലെ പോലെയുള്ള വല്ല്യ കടകള് വന്നാല് അവിടെ നൂറു കണക്കിന് തൊഴിലാളികള് ജോലി ചെയ്യുന്നുണ്ടാകും. അത് കൊണ്ടു തന്നെ അവിടെ മുതലാളിമാര്ക്ക് അതികം തട്ടിപ്പൊന്നും നടക്കുകയില്ല. എങ്ങനെ എങ്കിലും കാര്യങ്ങല് പുറത്തറിയും. പോരാത്തതിന് ഓരോ കടയിലും അവിടെ നിന്നു തന്നെ ഉള്ള വളരെ അതികം ആള്ക്കാര്ക്ക് ജോലി ലഭിക്കുകയും ചെയ്യും. 3 കോടി വരുന്ന മലയാളികള് വാങ്ങുന്ന എല്ലാ സാധനത്തിനും വില കുറയുകയും ചെയ്യും. കൃഷിക്കാര്ക്കൊക്കെ കുറച്ചു കൂടി നല്ല വില കിട്ടുകയും ചെയ്യും. ഇതിനെല്ലാം എതിരെ ആണിവര് സമരം ചെയ്യുന്നത്. സത്യത്തില് ഇവര് ഇവരുടെ കുത്തക നില നിര്ത്താന് ആണ് സമരം ചെയ്യുന്നത്. സാധാരണ ക്കാരുടെ പാര്ട്ടി എന്ന് അവകാശപ്പെടുന്ന കമ്മ്യൂണിസ്റ്റ് പാര്ട്ടി കേരളത്തിലെ 3 കോടി ജനങ്ങള്ക്കും വിലക്കുറവ് കിട്ടുന്ന ഈ പ്രശ്നത്തില് പൊതു ജനത്തിന്റെ കൂടെയാണ് നില്ക്കേണ്ടത്.